Wij Adolph vander gnaden gaitz Hertoge van Gelre ende van Gulich ende Greve van Zutphen Doin kont Also die
Hoigebaren Furste onse lieve gennaide here ende vader onsen lieven vrunden den Burgermeisteren Scepenen ende Raitt
Burgeren Ingeseten ende ondersaten onser Stat ende Scependoms van Tiell ende van Zandwick gegeven heifft te hebben
ende to behalden erfflick ende ewelick sekere vurwarden ende punten na uiwijsonge synre lieffden brieve dair dese
onse Transfixebrieff doirgesteken is / So bekennen wij mit desen selven onsen Transfixebrieff dat wij den
vurgemelte onsen lieven vrunden Burgermeistere Scepenen ende Rait Burgere Ingeseten ende ondersaten der vurgemelte onser
Stat ende Scependomps van Tiel ende van Zandwick geloifft hebben ende gelayven voir onss onse Erven ende nakomelinge /
alle punten ende vurwarden inden brieffe dair dese onse Transfixebrieff doir gesteken is In alsulcker maten als
onss lieve Here ende vader den selven Burgermeisteren Scepenen ende Rait, Burgere Ingesten ende ondersaten inden brieff
voirgeruert dat geloifft heefft erffelick ende ewelick ende ommermeer te halden ende te doin halden Ind niet to breken
In eynicherwijs sonder argelist Ind hebben des to orkunde onsen Siegell mit onser rechter wetenheit ain
desen brieff doin ende heyten hangen Gegeven inden Jaere onss Heren dusent vierhondertvijffendetsestich op Sent Mathijs
[dach Apostoli]

Per dominem ducem praesentibus de consilio nobili domino Johanne domino de
Egmonda Juniore / domino Mathya de Eyll milite necnon Johanne
Schenk de Nyddeggen et Godefrido Franssoys de Nyerssdom Armigero 
 

REGEST
24 februari 1465
Adolph, hertog van Gelre, bevestigt de doorgestoken brief van 3 december 1447. Gegeven in den jaere onss heren dusent vierhondert vijff ende tsestich op Sent Mathijs' dach apostoli. Met het zegel van de hertog in rode was.
Betreft: dijkrecht en pandrecht van Tiel en Zandwijk