Wy Heer Gerijt Laeckhuys vanden Weerdt Pater Elizabeth poirters van Dryell Matersse/ Soete van Heessell Procu=
ratersse ind voirt gemeyn Conventz des gotzhuys tot sent Cecylien bynnen Tyell van sent Augustinus oirdens In
Utrechtz kresdomz gelegen / doin kondt ind bekennen mytz desen apenen bryeve dat wy myt gueden volbedachten moede
ind beraedt dair op gehadt ind capittulariter dair op vergadert omb onsses Convents nutz proffyt ind orbers will
ind anderen onseren meerrer ind mercklicke schaiden to verhueden / recht ind redelicken vercofft hebben ind vercoipen
in krafft deses bryeffs den geestlichn Pryor ind Convent des goitzhuys tot den pretgeren In Coelne achtyen enckell
golde gulden kurfursten mu(n)tz by Ryne off payment dat dair guet voir is bynnen der Stat van sHarthogenbosch Inden tyt der 

betalonghe / Jairgulde ind erfflicher Renten ain ind uyt allen onsen / erven Renthen Thynsen ind allen anderen onser guederen
Rede ind onrede / dye wy nu hebben off hyrnaemaels vercrygen moegen As voir ind omb eyn sekere somme geltz nemtlich
vyerhondert bescheyden kurfurster golde gulden guet van golde ind swaer van gewichte / dye sy ons dair voir [gereit]
overgetalt ind waill betailt hebben Ind wy dye voirt in ons ind onsses Conventz nutz ind profyt gewant ind gekeert
hebben ind wy Pater Mater Procuratersse ind gemeyne Convent des goitzhuys tot sent Cecylien vurscreven voir onss ind
onsen nacomelyngen geloeven den egnanten pryor ind Convent pretger oirdens tot Coelne ind oeren nacomelyngen dye
vurscreven achtyen golde gulden erffrenthen van nu voirtain op onser cost anxt sorge ind arbeyt lossledich vry ind kommerloes

 

ind voirt onbeswairt van aller mallich bynnen der stat van sHartoigenbosch in pretger cloester op ennigen anderen
plaetzen dair sy des begeren sullen / guetlicken to leveren to geven ind waell to betalen alle ind yecklichs Jairs erfflichn ind ewelicken
in oeren sekeren behalt / op sente Peters dach gnant Cathedra Petri des tweeindtwyntichsten daeghs sfebruary offte bynnen vierthien
dair alreneestfolgende onbefangen sonder langher vertzoch / Dair aen ons noch onsen nacomelyngen geenreley besweernys schat
dyenst beede gebot noch verbot noch geenreley ander saicken beschudden noch beschermen off ontschuldigen zullen Ind dair
omb weertsaickedes got will nyet geschyen sall dat wy offte onse nacomelyngen ennichs Jairs dye vurscreven achtyen golden
gulden erfflicher renthen nyet en betailden alst vurscreven is ind ayn der betalongen versuemlich worden gevonden in deyle
 

offt to maele Soe moegen as dan dye vurscreven pryor ind Convent tzo den pretgeren vurgemelt oeren nacomelyngen off helder
deses bryeffs myt oeren gueden willen / onsen susteren ind Convent vurscreven bynnen Tyell ind onsen nacomelyngen voir dye erschenen
affterstedygen ind onbetaelden renthen Ind dair to voir allen costen offte schaiden den sy dair omb gedaen off geleden hedden
aynsprecken ind beclagen myt geystlichn off werlichn rechten Ind onses Conventz vurscreven ind onsen nacomelyngen erven renthen
thynsen ind anderen gueden rede ind onrede / woe ind waer sy dan gelegen offte gevonden wurden ayngrypen bekommeren
halden ind sich dair aen erhaelen van allen affterstedyghen renthen ind schaiden bys tot volkomelicker betalonghen

Dair op wy oick allen heeren Steden ind gerichten geystlichn ind wertlichn dair onder alsulcken kommer off ophaldigh
op ons off onsen guederen vurscreven geschege offte versocht wurden bydden in desen bryeff dat sy den vurscreven pryor ind
Convent oeren nacomelyngen off helders bryeffs myt oeren gueden willen dair to bystendich willen syn Ind onvertzoigen
recht doen alsoe duck sy des noit hebben ind begeven sullen / Myt desen vurwarden toe gedaen dat wy offte onsen nacomelyngen
vurscreven desen achtyen golde gulden erffrenthen vurscreven ewelicken ind alle wege / then ewygen daghen toe optden Taeldach vurscreven
loessen affleggen ind wederomb ayn ons gelden moigen ind onsen guederen vurscreven dair van vryen myt vyerhondert bescheyden

averlensche Rynschen gulden der kurfursten [muntzen] by eyne guet van golden ind swair van gewichte ind myt
eynen verschenen toe myne ind allen affterstedygen verschenen renthen / Ind sullen wy dese achtien golde gulden erff=
renthen vurscreven moigen loissen ind affleggen / tot tween termynen / alle termyn myt tweehondert golde gulden als vurschreven
steet Ind [leveren] dye den vurgemelte prior ind Convent pretger oirdens oeren nacomelyngen ind helder sbrieffs mit oeren
gueden wille bynne Colne op onsen anxt ind cost / in oir sekere behalt / Ind des to Oirkonde der wairheyt ind erfflichen
stedicheit So hebben wy Pater matresse Procuratersse ind gemeyne Convent van sunte Cecylien bynnen Tyell  vurscreven

onse gemeyne Convent Segell myt eyndrachtige verdracht eyns gemeyns Capittels voir ons ind onsen naeco=
melyngen ain desen apenen breyff gehangen Gegeven Int Jair ons heren duysent vyffhondert sessindtwyntich Den lesten
Dagh der Maente Januarij ^./.