Allen den genen die desen brief sullen sien of hoeren lesen doe Ic verstaen Walraven van Haeften drossaet
des lands van Bueren ende van Buesinchem dat voir my ende voir gerijcts lude hier beneden bescreven geco=
men is Herman Pijl in eenre volre scouwen opten Leck dijck mit sinen vrien moetwil ende heeft op gedragen
Willem Coppier tot behoef des gasthuys tot Culenborch enen vryen eygendom dijck vry thijns vry
van enen halven acker lands onder deel gelegen mitten gasthuys tot Culenborch die gelegen leit ter
Weyde inder heerlicheit van Buesinchem voirscreven by Gerijts van Nattenvelt ende toe te behoeren plach Hubert
Damen soen na Inghehout der dijckrecht brief die ic daer af heb gans gave ende gheheelt vol ende
al wael besegelt mit des drossaets segel ende der heymraet segel daer boven naest gelant is Otte
Wonder beneden naest dat gasthuys tot Culemborch Ende heeft daer voert op vertegen mit hande
halme ende mit monde alsoe dat die gerijcts lude wijsden dat daer Herman Pijl voirscreven af onteerft is
ende siin erven ende daer niet meer rechts noch toeseggens aen en behielt noch siin eerfgenamen

ende dat dat daer Willem Coppier voirscreven tot behoef des gasthuys aen gheerft is ende siin erven
ende nacomelingen ende dat siin vast ende stede is ende siinre nacomelinge tot behoef des gasthuys
voirscreven Voert soe ghelove ic Walraven van Haeften als drossaet des lands van Bueren ende van Buesinhem
van wegen mijns liefs Heren van Gelre dit voirscreven lant te vryen ende te waren Jaer ende dach tegens al
den genen dies ten recht comen willen als een drossaet ende dijcgreef sculdich is te doen na inghe=
hout der dijckrechtbrief de ic Walraven daer af gegeven heb ende al voir commer ende voir plicht af te
doen als erfcoep recht is Inden lande van Bueren ende van Buesinchem Daer dit gesciede waeren over
als gerijcts lude Jan van Hoemoet Jan van Tiel Macharijs soen In oerconde des soe heb ic Walraven
van Haeften als een drossaet des lands van Bueren ende van Buesinchem desen brief besegelt mit
minen segel Ghegeven Int Jaer ons Heren dusent vierhondert drie ende veertich op Siinte Gheertruden
dach der heiliger Joncvrouwen

Regest
1443 maart 17
op Siinte Gheertruden dach der heiliger Joncvrouwen

Walraven van Haeften, drost van Bueren en Buesinchem, oorkondt dat Herman Pijl
overgedragen heeft aan Willem Coppier, ten behoeve van het gasthuis te Culemborg,
"enen vryen eygendom dijck vry thijns vry van enen halven acker lands onder deel gelegen
mitten gasthuys", gelegen in de heerlijkheid Beusinchem ter Weyde. Aanwezige
gerechtslieden zijn Jan van Hoemoet en Jan van Tiel Macharijs soen.

In groene was een fragment van het zegel van de oorkonder.
afmetingen in mm: 214 x 137/122

[^van de Ven nr. 96, Hokke nr. 252]