Ic Aelbert die Keymp doe kont ende kenlic allen den genen die desen brief zellen zien of hueren lesen dat ic van Wouter die Bruun ende Melis Scavaert
gasthuysmeister tot Culenborch in dier tijt van wegen des gasthuys tot Culenborch enen hof die Huberts vander Zijl te wesen plach mit enen hofstat
die dat gasthuys voirseyt daer naest aen leggende had daer boven naest gelant is Herman Koevoet ende beneden naest gelant Griet Aernt Gans
ende Ydeken Gans te samen hebben erfpacht gehuert ende ontfangen daer ic of mijn erven gebrake mijns den gasthuys voirseyt alle iaer af sculdich
zijn ende geven zellen anderhalven ouden Vrancrijcsten scilt alse onselieve here van Culenborch dan iaerlix van sinen pacht doet nemen Te betalen
alle Jaer in die vier heilige dagen van mijdwiinter of binnen viertiendagen daer na onbegrepen Ende mede soe sel ic al alzulken tiins alle iaer
geven ende betalen buten cost des gasthuys voirseyt als onse lieve heer van Culenborch uut desen voirscreven hoven heeft ende te bueren pleecht . Uut sake

dat ic of miin erven of mijns gebrake desen erfpacht voirseyt niet en betaelden tot alzulke dagen ende terminen als voirscreven staet Soe mogen
die gasthuysmeisteren des voirseyde gasthuys dese hoven voirseyt weder aen vaen of si willen ende doen des gasthuys orber mit desen hoven Ende wat
scade of gebreck dan dat gasthuys voirseyt van Jare tot iare daer bij lede dat sel ic of mijn erven of mijns gebrake hem op richten ende betalen
totter gasthuysmeistere sympele seggen zonder ede tot huere maningen Ende want ic wil dat dit vast ende stede ende onverbroken blive van mij
ende van minen erven soe heb ic gebeden Willam Zuermont ende Reyner Ernstzoen onsen borgermeisteren in dier tijt desen brief over mi te se
gelen om gebreck des mijns Ende wij Willam ende Reyner voirseyt hebben om beden wil Aelberts voirgenoemt desen brief besegelt mit onsen segelen
Gegeven Int iaer onss Heren dusent vierhondert vive ende dertich dinxdages nae Onser Liever Vrouwen dach Conceptio

Regest
1435 december 13
des dinxdages nae Onser Liever Vrouwen dach Conceptio

Aelbert die Keymp verklaart dat hij van Wouter die Bruun en Melis Scavaert,
gasthuismeesters te Culemborg, een hof "die Huberts van Zijl te wesen plach" en een hof
"die dat gasthuys daer naest aen leggende had" in erfpacht heeft ontvangen voor
anderhalve oude schild per jaar. Boven naatgeland is Herman Koevoet en beneden Griet
Aernt Gans en Ydeken Gans samen.

In groene was de beschadigde zegels van Willam Zuermont en Reyner Erntszoen,
burgemeesters.

afmetingen in mm: 245 x 103

[^van de Ven nr. 82, Hokke nr. 321]