Wij Johan van Pallant heere tzo Wyltenborch tzo Withem etc. Doen kondt ende bekennen dat wij doir onssen
getruwen Dirck van Koten stadthelder van onssen leenen oirkonde onsse mannen van leen nabescreven overmits
williger opdracht ende verticht van Gijsbert van Doern in onssen handen gedaen van thien hont lantz soe groot
ende soe kleyn as die gelegen sijn In die Achtercope tot Boesinchem waer naestgelant die heeren van den Doern
tUtrecht beneden onsser Vrouwen Bruederscaph tot Culenborch verlijt ende beleent hebben verlijen ende belenen Johan Buth
potmeester tot Culenborch mitten selven lande vurseyt tot behoeff des Pots ende huyssarmen tot Culenborch Te houden
van ons ende onsse nakomelingen die potmeesters Inder tijt ende hoeren nakomelingen In behoeff der huyssarmen vurseyt ten
Zutphensen rechte Te verheergewaden alst mit recht verschijnt mit een ponde guetz geltz behoudelijken Gijsbert
van Doern ende Anthonia vander Way sijn echte huysfrou hoirre beyder lijfftocht te hebben ende te gebruken hoirre
twijer leven lanck aen den selven lande vurseyt tot allen tochten recht voirt ons ende een ygelijken hoirs gueden rechten
Daer dit aldus geschieden waren aen ende over onsse mannen van leen Jan Jan Beerntsoon ende Willem Cornelissoon ende
meer gueder mannen In kennisse der waerheit soo hebben wij Johan heere vurseyt onssen segel ten saken van onsen
leenen beneden aen desen brieff doen hangen Gegeven Inden Jaer ons Lieffs Heeren dusent vijffhondert acht opten
sesten dach In marcio