Wy Geryt van Culemborch Hubertzoen ende Gisbert Thoniszoen scepenen tot Culemborch oirkonden onder onsse segelen dat
voir ons quam Jan Dircxzoen die timmerman ende heeft mit goeden rypen wel voirbedachten berade gedisponeert ende gemaict
den Poth binnen Culemborch een mud weyts des syaers euwelick ende erffelick geduerende / uuyt zyn huys ende erve soe dat
mit allen zynen rechten ende toebehoeren gelegen is aende Santstraet tusschen Willem Aelbertzoen aen deen zijde ende den wouwer
aen dander zijde / ende dat tot vermeerderinge eenre spyndinge die Wauter Otten om Godes wille gegeven ende gemaict
heeft / verschynende Jaerlicx opten Heyligen Paisdach daer opten Heyligen Paisdach als Jan voirscreven deser werelt overleden
ende gestorven sal zyn dat yerste mud weyts voirscreven verschenen ende omcomen sal wesen Ende soe voirt aen van Jaer te
Jaer euwelick ende erffelick geduerende Geschieden dese betalinge Jaerlicx nyet ten daghe voirscreven soe mach men dat uuyt
panden aenden huyse ende erve voirscreven als men vry erffrenten gewoentlick is te panden Inden scependom van Culemborg doch
mit voirwaerden toegedaen dat die potmeysters Inder tyt gehouden sullen zyn altyt op woensdach nae beloken Paisdach
over die ziele van Jan die timmerman voirscreven / voirscreven mud weyts In rechter aelmoesen te spynden ende te deylen
ende te deylen den gerechtigen armen daert meest van node ende bestayt sal wesen sonder argelist Gegeven Inden
Jaer ons Heren duysent vijfhondert ses ende veertich opten een ende twintichsten dach in April
Regest
1546 april 21
Geryt van Culemborch Hubertzoen en Gisbert Thoniszoen, schepenen te Culemborg,
oorkonden dat Jan Dircxzoen die timmerman vermaakt heeft aan de Poth te Culemborg, een mud "weyts"
per jaar afkomstig uit zijn huis gelegen aan de Santstraet tussen Willem Aelbertzoen en de
vijver, ter vermeerdering van de uitkering die door wijlen Wauter Otten ingesteld is.
De zegels van de oorkonders zijn verloren gegaan.
Afschrift in inv. nr. 1452 fol. 51 verso.
Ondertekend door Cristiaen Diericxzoen.
afmetingen in mm: 280 x 93
[^van de Ven nr. 504, Hokke nr. 367]
