Op huijden date ondergescreven Is gecompareert In eijgener persoon Cornelia Aert Neijen dochter wedue wijlen Thoenis Gerijtssoon voer mij Melchior van Culenborch Hubertssoon als
stadthouder vanden leenen des graefscaps van Culenborch ter presentie van leenmannen nagenoemt te kennen gevende dat Int passeren vanden testamente oft make aen
dandere zijde huere meninge geweest te hebben ende alnoch Is ( hoe wel t selve aldaer soe met uuijtgedruct en staet mogelic duer versuijm oft anderssins ) als dat de
kerkmeesters van Sunte Barbaren kercke Inder tijt den Jaerlicxen dienst ende eeuwige missen sculdich ende gehouden sullen zijn te bestellen aen schamele ende ongebeneficieerde
priesters soe verre die te becomen zijn binnen deser stadt Culenborch / op alsulcken sallaris als de make dat verclarende Is /  Versouckende de voirseijte Cornelia aen mij
stadthouder voirscreven t selve alse te bevestigen ende te confirmeren /   Soe dan t selve een duechdelic ende caritatijf werck Is /  Heb Ick sulcx als stadthouder voirscreven

geconfirmeert ende bevesticht confirmeren ende bevestige mits desen notule / Verbindende de kerckmeesters Inder tijt tot onderhoudenisse van dien ten eeuwigen dagen /
Daer dit geschieden zijn bij aen ende over geweest als leenmannen Joost Cornelissoon ende Peter Cool /  In oirconde heb Ick Melchior voirscreven mijnen naem ende gewoenlic hantteijken
hier onder gestelt / ende tot meerder kennesse hebben wij leenmannen voirscreven ten bevele van mijnen Heeren den stadthouder voirnoemt oic elcx onsen naem ende gewoenlicke
hantteijcken hier onder gestelt den xxviii ^en dach van septembri Inden Jare Ons Heeren duijsent vijfhondert ses ende vijftich ./.
                                                                                                               Mij oic tegenwoerdich J.v Cuijck Hz
                   Melchior          Joest Cornelisz         Peter Cool Gerijtz