Wij Reynalt bider genaiden Goits Hertoge van Gulich ende van Gelre ende Greve van Zutphen Doin kont allen luden ende bekennen mit desen apene brieve voir
ons ende voir onse erven ende nacomelingen dat wy overmits guetduncken onss selfs ende by Raide ende guetduncken onser vriende van onsen Raide / huden dis dages
gegheven hebben ende geven mit desen onsen tgegenweerdigen brieve onsen gemeynen Ridderen ende knechten onser lande van Bomelreweert ende van Tielreweert
ende den kirspelen van Beesde van Rynoyen ende van Harwarden / ende voert allen dien ghenen die huden dis daiges daer ynne geseten ende woenaftich syn ende
oich hiernamails daer yn kome te woenen ende te sitten alle alsulke Rechten ende Privilegijen als hier nae in desen onsen brieve beschreven ende begrepen
staen / dat is te weten inden yrsten / Soe waer doitslach inden voerseyde onsen landen geveelt / ende alle die klegen van dien doeden mensschen ymant inden doitslach
leechden / dat soilen alle die voerseyde klegen inder bancken alsmen die yerste klage doen sall ten Heiligen sweeren / dat die gheene die sy inden doitslach leggen
Raits of daits sculdich syn des doitslages by hoeren vijff synnen Voert were dat saike dat ymant inden doitslach geleget wurde / die in gevengnisse sete
off op syne eyde ginghe / eer die doitslach geschiet weere So wanneer dat die menssche drie weken dach hedde van dierre gevengnisse off eyden so
sal he kome mit hem vyften in orkunde van tween Scepen of meer ende verbieden hem voer den Richter ende doen syn onscholt daer mede ende of he

den Richter nyet bekome ende kan So sall he die onscholt dan doen inden neesten gedinge daer nae inder bancken voer den Richter ende tween Scepenen off
meer Ende off die Richter die onscholt dan nyet nemen ende wolde So sall die menssche syn lijff daer mede nochtant beschudt hebben ende syn lijff vrij ende
quijt hebben / Voert willen wy weere dat saike dat ymant inden doetslach geleget wurde die buyten lants weere eer die doetslach geschieden So moichte
die menssche bynnen eynen Jaer ende sesse weken nae dien dat die dorde klage vanden doitslage over hem ghegaen weere komen voer den Richter mit vier
guden mannen in orkunde van tween scepenen off meer / ende verbieden hem voer den Richter ende doen daermede syn onscholt Ende of he den Richter dan nyet
bekomen ende kan so sall he die onscholt dan doen inden neesten gedinge daer nae inder bancken voer den Richter ende tween scepenen off meer Ende en wolde
die Richter die onscholt dan nyet nemen So sall die menssche nochtant syn lijff daer mede beschudt / ende quijt hebben / Voert of wy off onse Amptman off
onse Richter die nu syn off hiernamails wesen soilen ymant ennigerhande broeken anstreden of an tghegen voer Scepenen daer en soilen wy onse Amptman
noch onse Richter gheyne langer vorste af nemen noch hebben dan drie viertiendage after eyn volgende ende daer en tenden so moigen wij onse Amptman
of onse Richter sonder vertrecken dat ghedinge dryewerff after eyn vorsten ende nyet meer Ende of wy onse Amptman off onse Richter / daer en tenden

nyet en dinghden opten viertiendendach neest volgende dien voerseyde sesse viertiendagen So solde die menssche die daer angespraken doe vanden anspraeken ende
broeken quijt wesen Ende off wij onse Amptman off onse Richter dan dinghden so sal die menssche dan dat eynde hebben opten voerseyde sevende viertiendach
gewonnen of verloeren vanden broeken daer he aff angespraken is beheltelich dien Scepenen hoere vorsten / Voert oft geviele ende geschieden dat die voergenoemde onse
ondersaite of ennigen mensschen van Utrecht off opten gestichte van Utrecht wonden sluegen / lemden / off doetsluegen dat die voerseyde ondersaite die dat
deden daer an / weder ons ende onse heerlicheiden nyet meer broeken en soilen noch missdoen dan op alsulke broeken als die van Utrecht ende vanden gestichte
van Utrecht voerseyt off breken of sy onsen ondersaiten des gelychs deden bynnen der Stat ende gesticht van Utrecht voerseyt / Voert soe sullen onse Amptman
ende Richter die nu syn off hiernamails wesen soilen Eer sy hem des Ampts ende des gerichts onderwynden sweren op dese tgegenwerdige brieve gelijch den
anderen brieven daer yn onser goider lude voergenoemt Rechte beschreven staen / Mer alle broeke die vervallen ende verschenen sijn / voer dach datum deser brieve die sall ende mach
onse Amptman ende Richter op die stede daer sich dat geboert vorderen ende ynwynne tot onser behoeff nae den alden lantrechte Ende wy Hertoge voergenoemt hebben gelaeft

ende gelaven yn goiden truwen / voer ons en voer onse erve ende nacomelinge dien voergenoemde onsen ondersaiten / alle dese voerseyde punten gelych die voergeschreven staen / vaste
stede / ende onverbrekeliken te halden ende te doen halden ende nyet daer tghegen te doen noch doen doen noch laiten geschien in ennigerwys Alle argeliste hier yn uytgescheiden
In orkonde der waerheide alre saiken ende punten voergeschreven hebben wy Hertoge voergenoemt onsen Segel mit onsen rechten weten ende willen an desen apene brieve doen hanghen
Gegeven inden .. Jaeren onss Heren dusent vierhondert ende drie des neesten Goidendages nae Sente Servacius dach des Heiligen Bisschops ...

Per dominum ducem presentibus de consilio Nobili Frederico de Bronchorst
domino de Borclo et Udone die Boese Reddituario supremo