Wy Anthonius vander Plancken / By der genaden Gaids / Abt des Eerweerdigen gaids huijss ende Cloesters van Sunte Marienweerde / doen kondt ende kenlick alle den
ghenen die dessen tegenwoirdigen vidimus brieff sullen sien / off hoeren lesen / Ende bekennen overmytz dessen selven brieve / dat wy gesien gehoert ende vulkomelick
gecollacioniert hebben eynen apenen gueden besegelden bryeff In pergament gescreven guet ganss geheell ende ghene In segell In scryfftuer ende In pergament / ongecanseliert
ongerasuert / ongevicyert / sonder ennych vicium offte lack / dat wy daer In gemercken off bekennen mochten / uuthangende besegelt In roeden wass / myt segell des
Hoigebaren vermogenden Fursten ende Heren / Heren Arnholtz Wilne[re] Hertoge van Gelre / ende van Gulich ende Greve van Zutphen / den Got barmhertich sy / Inhaldende ende
van woirde to woirde / alleens sprekende ende luydende / gelyck hier na bescreven volgt / Wy Arnolt vander gnaden Gaeds / Hertoge van Gelre / ende van Gulich ende
Greve van Zutphen / Doen kont allen luden die desen brieff sullen syen off hoeren lesen / Want ende alsoe / onse lieve Neve Gerart Here tot Culenborch / ende tot Weerde / mit

synre lieffden Stat ende lande van Culenborch onss In onsen kenlicken noetsaecken / zere truwelicke gedient ende behulpelick geweest heeft mit veden ende anders Ind off Got
will sich voirt an onss bystendich wesen ende volherden sullen / By den welcken hy ende die syne tot groten verderfflicken schaden / ende achterdeel gekomen syn / soe sy
lyff ende guet truwelicke om onsen will / geaventuert ende uytgesat hebben / Alsoe dat wy omme den selven truwen dienst / onse Neve vurseyt ende die syn / onss alsoe bewesen ende
gedain hebn / ende noch vurder doin willen / Ind oick uyt rechter lieffden wy tot onsen Neven vurseyt ende synen Burgeren tot Culenborch hebn Soe bekennen wy Hertoge
vurseyt In desen Apenen brieve voir onss / onsen erven ende nakoemelyngen / dat von by onss selven / ende oick by rade / ende guetduncken onss lieven gemynden brueders Wilhems
Here tot Egmont / ende anderen van onsen Raetzfrunden geconfirmiert ende bestedicht hebn Confirmiren believen ende bestedigen mit desen onsen brieve / alle alsulcke
rechten privilegyen ende vryheiden / Als die heren van Culenborch ende die Stat van Culenborch In tyden voirleden mit hoeren guede ende dienst gewonnen / besuert ./
ende verkregen hebben / van onsen voervaderen Hertoge van Gelre zeliger gedachten / Voert an Alsulcke Averdrachten ende Enicheiden / als Intyden voirleden gemaickt

syn tussen den heren van Culenborch / ende den heren van Bueren zeliger gedachten / Willen wy die selve brieve / onsen Neve vurseyt dair van heeft In mathen laten ende
gehalden hebben tot ewigen daigen / Ende willen oick mede / dat die Burgeren / ende ondersaten van Culenborch van nu voertan hoir pachten ende schulden In onsen lande van
Bueren ende van Boesinckhem / sullen moegen manen heffen ende boeren / off mit onsen Rechten Inwynnen / gelyck ende In alre manieren / onse ondersaten Inden vurseyde lande
van Bueren ende van Boesinckhem geseten / hoir pachten ende schulden In vurderen / ende to wynnen plegen / tot ewigen daigen toe / Dess gelicken onse ondersaten Inden
lande van Culenborch weder omme doin sullen / Alsoe oick onse Neve van Culenborch vurseyt enen brieff heeft / van heren Wilhem die here tot Bueren was / Rurende
van enen waterganck / als van eyn kleyn polreken lands gelegen by Culenborch / geheiten Reekom / te lopen ende te wateren doer die Weytstege In des Bischopsgrave
believen ende Confirmiren wy also / dat die selve brieff ende allet dat hy vermach / vast ende stede In mathen blyve ende gehalden warde tot ewigen daigen / sonder enighe

Indracht daer In te suecken In ennigerwys / Mede so hebn wy / onse Neve vurseyt gegont ende beliefft als dat hy endesyn burgere eyn brugge sullen leggen moegen thenden
Lanxmer aver dis Biscopssgraeff / daer sy voirtytz gelegen heeft / Alsoe dat onser beyder burgere ende ondersaten to beyden zyden hoer koern ende anders dair aver vueren
ende mennen sullen moegen tot allen tyden / Oick soe moegen onse Neve vurseyt syn burgere ende ondersaten op den Beesder Wech / geheiten Vergowkens wech tot alre tyt
mit kaen besorgen dycken ende maecken / soe hem des noet nut ende orbar dunckt wesen / omme onrecht water uyt hoeren lande to keren / Ende want wy Hertoge vurseyt gelaefft
hebn ende willen / dat alle punten In desen brieve begrepen / ende elck punt dair aff besonder tot ewigen daigen vast ende stede gehalden warde Ontbyeden dan omme ende
bevelen / alle onsen Drosten / Amptluyden / Schatmeisters / Richtere / Scholte / ende allen anderen onse Officiers ende Dyenres die nu syn off hyernamails wesen sullen / hyer en
tegen off contrarie nyet te doin / te doin offte laten geschien In gheenre manieren / mer dat allet vast stede ende onverbraecken In mathen laten ende  van weerden
halden gelyck ende In alre manieren als voir verclaert beschreven steet / Mede weert saecke dat dese tegenwoirdige brieff tot enniger tyt nat gaterich vleckig off

rasuerich were off wurde / tsy Inden Segelen wapenen woerden / off In enniger andere manieren verargert off gecancelliert mucht warden / Soe willen wy nochtant
dat dese vurseyde tegenwoirdigen brieff / elck punte besonder ende allet dat hy vermach / In synre volre machten blyve / ende volcomentlick gehalden warde tot ewigen
daigen als voer beschreven steet / gelyck off die selve brieff vurseyt dat gebreck nyet gekregen en hed / off rasuerich en weer gewurden / Welcke vurseyde punten ende elck
besonder wy Hertoge vurseyt voir onss onsen erven ende nakoemelingen gelaefft hebn ende laeven avermitz desen onsen tegenwoirdigen brieve In gueder trouwen
by onser furstlicker Eeren ende geloven vast stede ende onverbrecklick to halden / te doin ende te laten halden / sonder ennich Indracht off nyevonde off behendicheit van onss
off ymant anders van onser / off van onser erven offte nakoemelingen Hertoge van Gelre wegen / dair In te suecken toe gheenre tyt / Ende dit allet ongeveerlich ende
sonder argelist Ende des toe oirkonde der wairheit ende gantser vaster stedicheit alle deser vurschreven punte / So hebn wij Hertoge vurschreven voir onss onsen erven ende nakoe-
melingen / onse Segell mit onsen rechten weten ende gueden wille an desen apenen brieve doin ende heyten hangen Gegeven Int Jaer ons Heren dusent vierhondert 

tweindtseventich / des vrydaiges na des Heiligen Sacramentz dach / Aldus onderteykent / Per domini ducem præsentibus de Consilio Nobili Frederico filio de Egmond
domino de Yselsteyn etcetera Necnon domino Wilhelmus de Bochorst Magistro Curie Milite / Ende want wy Anthonis vander Plancken Abt vurseyt dessen vurgeren brieff
waill doersien ende gecollacioniert hebben als voirscreven staet / So hebben wy des torkonde der waerheit onser Abdeyen Segell aen dessen tegenwoirdigen brieff gehangen
Gegeven Int Jaer ons Heren dusent vierhondert Negenendetsoeventich / den soevenendetwyntichsten dach In Meerte /

Regest
1479 maart 27
Anthonius van den Plancken abt van klooster Mariénweerd geeft vidimus van een akte d.d.d 1472 mei 29 waarin Arnold hertog van Gelre wegens trouwe diensten de privileges van Culemborg bevestigt en vemeerdert.

Het abdijzegel in rode was is verloren gegaan.

Deze akte verwijst naar een akte van 1472 mei 29

Afmetingen in mm: 460 x 362