Wij borgemeysteren scepenen ende gemeen rade [der stede] van Scoenhoeven doin condt ende kenlick allen luyden die desen brieff sullen syen off horen
lesen dat wij by overdracht ende consente m[... eene] oirschap om noit orbair ende profijt van onser stede van Scoenhoeven well ende wyttelick
vercoft hebben vander gemeenre stede ende op [die stede van] Scoenhoeven voirscreven Heeren Goeswyn van Dichteren Wouterszoen priester tyen gouden
Koirvorsters Overlantsche Rijnsche gulden siaers [...]r van [goude] ende zwair genoich van gewychte off payment ain anden goeden goude
Dat soe goet Is Jairlix te reynten alsoe l[an]ge duerende als hy leven sall ende nyet langer dair hy ons wyttelick ende well aff betailt
heeft den lesten pennynck mytten eersten ende [...] In o[...] onser ghemeenre stede geleyt hebben hyer by soe hebben wy heeren [Goeswyn]
voirscreven vanden gemeenre stede wegen voirscreven geloeft ende geloven die voirscreven Reynten te waeren ende te vryen alsoe lange als hy leven sall als [...]
goit van allen commer ende van antalen van allen heeren ende yegen elcken mynsche ende geloven hem off synen zekeren bode / hebbende een copie [van]
desen brieff besegelt myt enen zegell autenttyck dese voirscreven Reynten alle Jair op onse cost anxt ende arbeyt wel te betalen bynnen die stede [van]
Culenborch off bynnen der stat van Utrecht van allen commer ende van allen zaken op Sunte Jorys dach naistcomende off bynnen den eersten vyertien dagen
dair nae ombegrepen ain goeden gouden guldens als voirscreven stait off ain anderen goeden goude als die guldens weerdich syn off dair [...] tot
Culenborch off tUtrecht om coepen mach tot elcker tyt der betalinge alsoe lange als heer Goeswyn voirscreven In levende lyve Is myt d[...]
voirwairden wairt saicke dat wy heeren Goeswyn voirscreven off synen gewairden bode nyet en betailden alle Jair als voirscreven stait doe verwillekueren wij
hem dair toe sculdich te wesen tot eenre penen elckes dages wair dat wy In gebreke waeren vyer oude Vleemsche groten ter tyt toe dat wy
die voirscreven Reynten myt der penen voirnoemt betailt sullen hebben Ende als heer Goeswyn voirscreven der penen nyet langer berden en will [...]
mach hy off synen zekeren bode hebbende een copye van desen brieve bezegelt myt enen zegell autenttyct onse poirter off poirterse die hy
vynt In enichs heren lande ofte steden hoir lyff ende goet besetten ende houden mytten rechte alsoe lange dat hem dat voirseyde gelijck [...]
ende penen dair op gegangen ende verschenen voll ende all betailt syn Ende dair van en sell ons gee[n g]eleyde noch vryheyt in me[...]
ontheffen noch bescudden en wy en sullen hiefftall ende penen betalen sonder enige audwonde die geviseert Is off diemen [...]
in enygerwys Ende wairt saicke dat desen tegenwoirdigen brieff tot enyger tyt worde gestolen verbrant gescoert off [geargert]
In enigerwys soe geloeven wy heeren Goeswyn voirscreven dat wy hem enen anderen brieff sullen geven open bezegelt myt onser stede orate
zegell dair [desen] brieff mede bezegelt Is [opten] derde nae den transscrifte van desen brieve sonder enich wederseggen bynnen
viertien dagen [d]at wys eerst ver[...]ent werden van heeren Goeswyn voirscreven off synen gewairden bode Ende Ende alle dese voirscreven
voirwairden ende [...] hebben wy geloift ende geloven vander ghemeenre stede wegen voirscreven wel te houden ende te voldoen In g[oeder]
trouwe In k[entnisse de]r wairheyt soe hebben wy desen brieff open bezegelt mytten groeten zegell onser voirseyder stede van
Scoenhoeven s[...] Sunte Jorys dach Int Jair ons Heren Dusent vierhondert vierendetzeventich
Copia hec collationatum est per me Theodericum filium Johannis Hackert Nostrorum publicum
et [conc]ordat de hora ad verbum cum originali teste manu mea propria hic subscriptione
Regest
1474 (na april 23)
Rond Sunte Jorys dach
Burgemeesters, schepenen en raad van de stad Scoenhoven[Schoonhoven] verklaren verkocht te
hebben aan heer Goeswyn van Dichteren Wouterszoen, priester een rente van tien "Koivorsters Overlantsche Rijnsche"
gulden per jaar te betalen te Culenborch of te Utrecht.
Geen zegels.
Gelijktijdig afschrift op perkament, gewaarmerkt door Theodorus Johanniszoon Hackert,
notaris. Gevonden als omslag voor een band 15e eeuwse rekeningen van
het St. Petersgasthuis. Het stuk is erg beschadigd en gerepareerd met papier.
afmetingen in mm: 376 x 203
[^van de Ven nr. 153, Hokke nr. 317]
