Wij Scepenen Borgemeijsteren ende Raet der Stadt Saltboemel doen kundt ende maecken openbaer dat wij ten guetlicken versuecke onser mitburgeren den giltbroeders nemptelick den wevers ambachtsluijden gunnen ende toelaeten vermits desen alsulcke statuten ende ordinantien to halden ende onder [.....anderen] te gebruijcken als
hier nae beschreven staen allet to wederseggen minderen meerderen en veranderen van Scepenen Burgemeijsteren ende Raedt voerseijt Inder tijt wesende
Item In der Stadt van Saltboemel en sal niemant tvoerseijde ambacht den hij en sij burger ende soo wie daer vreempt In coempt ende alhier tvoerseijde ambacht doen wille die sal geven vier Overlantsche Rijns Kuerfurster guldens off ander payment daer voer In gelijcker weerden die een helft die Burgemeijster Inder tijt ende die ander helft den gemeijnen
giltbroeders ende noch acht ponden was deen helft der Fabrijcke van Sinte Martijns kercke ahier ende die ander helft den gemeijnen gilde Ende wat vremde In desen ambacht coemen ende voer meijster wercken willen sullen voer Ierst mit Segel ende brieven off loofweerdige Conschappen aen Scepenen Burgemeijsteren verthoonen dat sij sich eerlicken ende
als goede mannen ende persoenen gedraegen hebben ter plaetsen sij gewoent hebben / Voort soo wie een geboeren burger alhier Is die sal geven twee ^gouden gulden als voerseijt ende vier ponden was to deijlen als vanden acht ponden voerseijt Is ende sullen die deeckens des voerseijde ambachts Inder tijt wesende der voerseijde Fabrijcke [voir Ierst haere gerechtich. . . .]
van uutrichten

Item soo wie meijster des voerseijde ambachts alhier werden willen hij sij van buijten off van binnen die sal geven den ambacht eene ton biers ende den vier dekenen mitten boede Inder tijt een eerlijcke maeltijt ofte elck tien ^twelff stuver
Item niemant en sal alhier sijn Ambacht voerseijt moegen doen hij en heeft betaelt en vernuecht den Borgemeijsters Inder tijt van die penning voerseijt des en sal gheen meijster des ambachts voerseijt  meer dan drie getauwen moegen setten Ende van linnen en wullen te weven en salmen maer eens dat Ambacht behoeven te [w...]
voert waer die meijsters sterven sullen die vrouwen het ghilde genieten moegen soo lange sij oer niet verandersaeten
Item off dat In deser Stadt off In deser gerichte ennige onverstant oproer mangel difensie tweedracht oploope off dergelijcke (dat Godt Almachtich verhuede) opreese dat sij alsdan noch mit woerden noch mit wercken nijet aenrichten handelen doen noch voernemen sullen dan tot ghedien ende welvaert deser Stadt ende dat sij In sulcken valle
staen ende wesen sullen mit raet ende daet tot behoeff op ende aen sijde van Scepenen Burgemeijsteren ende Raedt voergeruert ende die mit allen oeren vermoegen onweijgerlicken ende trouwelicken assisteren ende bestemdt wesen sullen                                

Item die dekens noch oock niemant anders en sullen noch en sal die broeders des voerseijde Ambachts In heel noch In deel niet moegen noch doen vergaederen dan mit voerweten believen ende consent der Burgemeijsters Inder tijt sijnde op een brueck van ses Carolus gulden halff den Burgemeijsteren ende halff den gilde voerseijt
Item dat die giltbroederen bijden anderen sijnde versaemelt met raetslaegen handelen doen noch voernemen en sullen dan saecken dat voerseijde  Ambacht / vermoegens deser cedulle beruerende / op pene die daer Inne versijmelickn bevonden worden van drie Carolus gulden te deijlen als voerseijt
Item soo wie van desen Ambacht / op d'ambacht ennige penningen geloeft ende niet en betaelt / vermoegens alsulcke geloefte die sal sijn ambacht als hem die weet gedaen wordt stil laeten staen heen ter tijt toe hij heeft den selven vernuecht ende betaelt ende soo dick ende mennich mael hij daer boeven bekuert wordt soo sal hij gebrueckt
hebben eenen halven gouden gulden ende die to deijlen In manieren als voerseijt / Voort soo wie sijn ambacht van ennigen saecken den Ambacht aengaende verboeden wordt ende daer en boven werckt soo dick die deeckens hem daer en boeven bekueren sal hij bruecken eenen halven golden gulden te deijlen als voerseijt
Item soo wat meijsters off meijsters vrouwen datter sterven uuijth desen Ambacht voerseijt soo sullen die gemeijne broeders schuldich ende gehalden wesen durch ingebot vanden ambacht dat lichaem helpen ter aerden brengen als behoerlijck Is op eene peen van eenen halven golden gulden te deijlen als voerseijt ende die boede

sal hebben voer sijn Ingebieden eenen stuver Brabants Item soo wie den deeckenen Inder tijt te doen heeft die sal elcken deecken besunder geven een kan wijns oft drie stuver daer voer der gerechticheijt eer sij uuijten huijse sullen gaen / Ende soo wie een deecken Inder tijt Ietwets claecht ende des niet bewijsen en kan
sal selfs den man sijn ende Inder bruecken gehalden ende plichtich sijn die den beschuldichden Indien men hem des overgaen hadde gehalden soude hebben
Item oft Iemant van den Ambacht Iemants wercke aennaeme ende dat niet en voldede binnen een maent nae sijn beloeftenisse salmen dat selve werck weder van hem moegen haelen ende eenen anderen brengen moegen sonder becroonen
Item niemants en sal eens anders verdingde wecke aen[ne]men anders van voerseijt op peene van eenen halven golden gulden to deijlen als voerseijt oock en sal niemant egheen werck tweemael verdingen buijten consent en voerweten der vier deeckenen des Ambachts voerseijt op een peen van eenen halven golden gulden te deijlen als
voerseijt voort soo wie eens anders geschoeren werck werckt buijten consent des ghenen die dat geschoeren heeft anders dan In maeten voerseijt die sal daer aen gebrueckt hebben eenen halven golden gulden soo duck ende mennichmael hij daer op bekuert sal worden die een helft tot behoeff des Borgemeijsteres ende die
ander helft tot behoeff des Ambachts voerseijt Voert soo en sal niemant nae negen uren des avonts noch voer vier uren des morgents moegen wercken op een peene van vijff stuvers Brabants ^{to deijlen} als voerseijt Oock en sullen egeene deeckenen Inder tijt des Ambachts voerseijt uut moegen gaen om Iemants
te bekueren des avonts dan nae negen uren ende voer vier uren morgents

Item soo ennige meijsters des voerseijde Ambachts spoelt oft scheert om gelt ende niet en betaelt ende voert den selven salmen sijn werck verbieden moegen mitten boede vandien ambacht ende Indien hij dan daer duer bekuert wort nae dat hem sijn werck verboeden Is soo mennichmael als dat geschiet sal hij bruecken eenen
halven golt gulden to deijlen als voerseijt staet
Item soo wanneer die boede des Ambachts die gemeijne broeders Ingebiedt uuth consent ende bevel der deeckenen om te vergaederen ende spraeckt mitten anderen te halden ruerende den Ambacht ende daer en boeven Iemants niet en coemptper plaetsen hij verscheijden Is die sal gebrueckt hebben eenen halven golden gulden
te deijlen als voerseijt
Item off Iemants des ambachts voerseijt sijn giltbroeders dede vergaederen uuijten consent ende voerweten der deeckenen Inder tijt die sal gebrueckt hebben eenen golden gulden tot behoeff der vier deeckenen ende mede staen tot correctie van Scepenen ende Burgemeijsteren ende Raedt der Stadt voerseijt
Item niemant sal eens anders knecht te werck setten op een kuere van eenen halven golden gulden ten sij dat hij sijnen meijster daer hij bij geseten heeft Ierst voldaen ende vernuecht heeft oft mit gemoede daer aff gescheijden Is ende die bruecke halff ende halff te deijlen als voerseijt
Item soo sullen knechten des voerseijde Ambachts In allen punten ende saecken soo wel bruecken als die meijsters
Item op Severus dach voerseijt  Verswoeren Maenendach ende des anderen daechs nae onse kermisse te weten den ommeganck soo sullen dese voerseijde broeders op den drie teerdaegen voerseijt  een minnelijcke ende vriendelicke maeltijt gehalden sij mitten anderen to eten doer weten des boede vanden Ambacht ende wie alsdan

daer niet en coempt teren dat die soo veel gelden als die andere die teren ende noch daer en boeven te vervallen In een broecke van tien stuver te deijlen als voerseijt
Item soo wanneer dese voerseijde broeders op de voerseijde teerdaegen soo daer onmin oft onvrede maeckt onder die broeders oft ennige kijftelicke woerden opbringt In enniger manieren het sij te seggen ghije liget oft d'een des ander sijns vaeders werck heete doen oft ennige andere woerden daer twist oft twee
drach oft kijff uuth verrijsen mochte die sal bruecken eenen halven golden gulden den borgemeijsteren ende een halff tonne bier den gemeijne broeders
Voert soo salmen op Severus dach kiesen twee nije deeckens ende twee oude sullen affgaen ende wie daer tegen seet sal bruecken ^{ij gulden} soo dick en mennichmael hij dat weijgert ende effenwael gehalden wesen deecken to blijven ende die bruecken to deijlen als voerseijt ende die koere te geschien nu voert aen bij
den gemeijne giltbroeders alle Jaer op Severus dach die dan terende sijn
Ende des anderen daechs nae Sunte Severus dach soo sullen die deeckens die gemeijne broeders doen vergaederen ende alsdan sullen die voerseijde broeders vier goede mannen uuijth oer allen kiesen ende verordineren voer welcke vier goede mannen die alde deeckens alsdan dien nieuwen
deeckenen reeckeninge doen sullen van alles sij In oere Jaere Ingebuert ende uutgegeven hebben ende wat daer aen ontbreeckt ende te betaelen staet dat sullen die nije deeckens mit oeren ende der Stadt bode mogen panden ende maenen Indien die oude deeckens den nijen deeckenen Iet
tho reeckeninge brengen dat sij niet bewijsen en kunnen van wegen der gemeijnen Ambachts voerseijt geschiet to sijn oft tot prouffijt vandien aen haer werck versuijmpt te hebben dat salmen sulcks betaelen als haer 

eijgen propere schulde ende soo vern die burgemeijsters der Stadt Saltboemel die reeckeninge
gethoont wordt soo sullen die voer Scepen ende Burgemeijsteren ende Raedt voerseijt In maeten als voerseijt gehalden wesen te doen
Item niemant en sal leerJongens aennemen buijten consent ende voerweten der vier deeckenen Inder tijt op een kuere van ses stuver Brabants to deijlen als voerseijt Ende elcken leerJongen sal geven drie pont was halff den Fabrijcke voerseijt ende halff den gilde ende den bode des Ambachts
eenen stuver des soo sal den meijster gehalden sijn voer te loenen eer hij den Jongen aenneempt / Ende van het tgene dat die leerjongens die niet vrij en sijn betaelen moeten daer van sullen die deeckens Inder tijt des voerseijde Ambachts van het Ierste dat daer affcoemende Is den Fabrijckmeijsteren tot behoeff den Fabrijcke voerseijt hantreijcken ende betaelen oer ander halff pont was voerseijt oft achtalve stuver Brabants daer voer
Item soo wie den anderen afhendich maeckt tot een halff pont gaerns toe het sij min ofte meer die sal gebrueckt hebben sijn Ambacht als een man van buijten ende daer niet weder In comen ten waer bij genaede van Scepenen ende Burgemeijsteren ende Raedt der Stadt voerseijt ende den vier deeckenen
Inder tijt Ende valle dat Iemants den anderen sulcks overseijt hadde ende niet bewijsen en kondt sal die alsdan selfs daer voer aengesien ende gehalden worden

Item soo wat knechten Inder voerseijde Stadt Saltboemel wercken die sullen Jaerlicx geven eenen stuver Brabants van boeten tot behoeff des gemeijne gilde ^{ter stondt als sij wercken} Ende die knechten die gheen meijsters en sijn die en sullen gheen werck aennemen moegen op een peen van een halven golt gulden to deijlen als voerseijt
Item die deeckens Inder tijt sullen allen ende niet de boede oft Iemant anders den giltbroeders to weten den gilde aengaende moegen bekueren / Ende In valle den deeckenen ennigen onlust bekoeringe gebuerden van ennige ghiltbroeders die selve sullen effenwael broeckachtich sijn vermoegen
der cedullen ende sullen die becoerde daer beneffens staen tot corretie van Scepenen ende Burgemeijsteren ende Raedt
Item alle meijsters gheechte soen sal vrij wesen van wegen des Ambachts Ende soo wie In dit voerseijde Ambacht coempt die sal geven den bode des Ambachts eenen stuver Brabants
Item die vier deeckenen des Ambachts voerseijt en sullen niemants oerloft geven to wercken nae negen uren tsavonts noch voer vier uren smorgents op eenen peen van eenen golden gulden tot behoeff der Borgemeijsteren Inder tijt ende eenen halve golde gulden tot behoeff den gemeijnen gilde
Item voer soo sal wie hem selven voer een meester helt ende sijn Ambacht voer meijster gedaen heeft ende niet en doet gelijcke die gemeijne broeders van allen articulen als voerseijt staen ende In sonderheijt van alle teerdagen ende dat een Jaer lanck alsoo heen laet gaen die sal sijn Ambacht
gebrueckt hebben ende wesen als een man van buijten oft hij sal betaelendie terongen ende broecken daer toe staende nae vermoegens deser cedulle Ende die sanderdaechs comen teeren / sullen tot ghelijcke duanck ende executie van betalonge staen / als den Ierste dach

Item niemant en sal op beedaegen ^voermiddach noch op sonnendaegen den heelen dach ennich uuijtwendich handtwerck den Ambacht ruerende to handen trecken ende In valle daer Iements daer boeven bevonden worden sulcke doende oft dat men vernemen kunde die sal bruecken eenen halven Golt gulden te deijlen als voerseijt
Item soo het Wullewevers Ambacht ende het Linnenwevers Ambacht eertijts verscheijden geweest Is ende nu een geworden sijn Is ende wordt bescheijden dat die Wullen meijster Is die en sal gheen Linnen meesterschap gebruijcken ende Insgelijcken die Linnen
meesters egheen Wullen meijsterschap oft sij en hebben Ierst beijde die meijsterschappen Ingewonnen ende geworven In manieren voerseijt ende dat van nu voert aen
Item soo wat bruecken ende gerechticheijt van dit voerseijde verschijnen ende vervallen sullen en sullen die deecken die deeckenen Inder tijt des gilde voerseijt oer aenpaert van wegen des gilde voerseijt niet bueren noch ontfangen ten sij saecke die deeckens voerseijt en hebben Ierst den Burgemeijsteren Inder
tijt wesende sijn aenpaert ende bruecken gehantreijckt ende to vrede gestelt
Ende In valle die deeckenen voerseijt daer In tot versuijmelick bevonden worden soo sal alsdan Ieder deecken Inder tijt wesende gebrueckt hebben drie mael soo veel als die selve bruecke wesen mochte tot behoeff der Burgemeijsters voerseijt
Item oft Iemants bevonden worde brueckachtich In ennige vanden voerseijde articulen ende onwillich waere Inder betaelingen dien salmen die bruecken uuijt panden mitten geswoeren gerichts bode der Stadt Saltboemmel Sonder ennige pandtweringe daer tegens te doen gelijck

als heeren verwonnen schult des sal dat gilde voerseijt den boede loonen Voort oft Iemants Ietwes op sijn Ambacht gelost hadde voer ennige schulden oft anders ende der halven onwillig Inder betaelinge bevonden worden soo salmen als dan dat tselve Insgelijcken uut panden
Item soo wie knechten heeft binnen sijnen huijse die en sal hem geen voerloon geven ende wie men daer en boeven bevijndt sulcken doende die sal gebrueckt hebben eenen halven golde gulden te deijlen als voerseijt
Dese statuten sijn den gilde voerseijt bij Scepenen Burgemeijsteren ende Raedt vergundt ende verleent doch altijt opt behaegen ende te minderen ende te meerderen bij Scepenen ende Burgemeijsteren voerseijt Actum xv.^en Maij xv^c. drieentachtentich /