Wij broeder Jacob van Goch prior des convents Jherusalem binnen Culenborch broeder Lambert van Gelcom supprior broeder Peter van Boemell procurator voert wij gemeyn conventualen des convents voirscreven belyen mits desen dat die Eerzame heere meyster Jan Hackert Anthonissoon priester ende vicarius van Sunte
Barbaren kerck der collegiael kercken van Sunte Barbaren binnen Culenborch ons ende onsen convent puerlick ende simpelick om Godts wille gegeven heeft eens die somme van ijc. golden Koirforster Rijns gulden van gewichten die wij terstont weder In noot oirbaer van onsen convent gekeert hebben Nementlicke hebben wij
dair mede affgelost ses golden Koirforster gulden Als voirscreven staen tsiaers erflosrenth die Goessen Berntz hadt uut vj mergen landts gelegen op Lanxmeer onsen convent toebehoerende Noch hebben wij dair mede gelost Jaerlicx ses golden Philippus gulden erfflosrenth die Herberen Sijmonsen hadt
uut ons nije huijsinge staende aenden Voirstraten bij dat convent ende noch Jaerlix achtien Brabants stuver losrenth voirscreven van Dichterens erven die zij noch ten achteren wairen aenden hooftsommen der Jaerlixe renthen van veerthiendenhalven golden gulden ende is nu tsamen gelost
Des wederom tot eene geestelick danckbairheyt hebben wij belooft ende beloven mits desen voir ons ende onsen nacomelingen / bij wille toedoen ende consent onses eerweerdichste vader heer Guilhelmus Zenderus provinciael onser oirden in Neder Duijtslant . te doen celebreren ende onderhalden eewelick ende erflick een eewighe misse vanden Heiligen
Geest alle weke swoensdaechs uutgesundert alleen den heyligen korsdach wanneer hij quame op den woonsdach dan sullen wy singhen die missen dijnsdaechs dair voir off donderdaechs dair nae zoe alre bequamst aldair gelegen sal syn Mer off men In toecommende tyede alle daghe twee singende missen hadde soe
salmen dese misse lesen opten korsavont off Sunte Stevens dach als korsdach opten woonsdaech quame Ende dese missen salmen singhen In manieren nae bescreven te weten alle woonsdaghe salmen totter missen luyden nae gewoonte onder kercken / ende tussen vi off vij uren de prime bycant uut synde
zullen wij mit alle onse clocken te hoop luyden / Dair nae sullen bereyt wesen de priester celebrant / diaken / ende subdiaken / tot desen dienst te doen mit allen solemnittyten oick mit allen onsen priesters ende choralen ons convents die gesont ende inden convent syn uut gesondert diet hair boerts
onder dese singende misse / misse te lesen / die sullen muegen affgaen tot ordinantie des priors alsoe nochtans dat het choor dair niet bij vercort en ware Ende by siecte offte groote merckelicken gebreken der personen zo mach een van onsen heeren bewairen den dienst van diaken ende subdiaken
ende anders niet / De priester celebrant dan bereyt synde mit diaken ende subdiaken tot hairder plaetsen ende die choralen In hairre stallen / sullen zy tsamen devotelicken op hair knyen vallen ende die Cantoer solemniteyt opheffen dat choor prosequerende Veni Sancte spiritus mit versikel ende collect / staende op
den altair twee barnende wasskeerssen tot dat die misse geheel uut sal syn / dan sal die misse by den cantoer opgeheven worden ende uutgesongen tracten ende solemniteiten off het den heyligen pynxter dach wairt ende werpen wieroock mit noch twee ander bernende waskeerssen soe lange dat Evangelium ende
elevatie duert te weten twee reijsen thurificeren ende onder die elevatie singen een devote prose Ave verum corpus off een ander daer toe dienende dat officium sal syn Spiritus dominicus kyrie Orbis factor mit syn gloria credo sanctus / Agnus Dei Ite missa Jesu dat graduael Beata gens Allen Veni Sancte Spiritus
Ende alsmen dat alleluia beghint zullen de priester mit diaken ende subdiaken mitten geheelen choor devotelick op hair knyen vallen ten eynde toe Tempore paschah prima alleluia Emitte Sequentia Sancti Spiritus adsit off Veni Sancte alternatis veribus epistola cum audissent apostoli / off Dum complerentus evangelium Si quis die
off Cum veniret paraclitus oick alternatis veribus Men sal oick houden bij den collect een ander collect pro fundatore sacerdote vinete postquam mortem eius proxime sacerdote sunt defuncto mitt eender collecten pro benefactoribus defunctis Men sal oick houden off Confirma Con ffactus est repente In septuagesima Introitus Dum
sanctificatus fuero Tractus Laudate dominium off dat versikel van Sancte spiritus sonder alleluia Cetera non mutabunt Nae de missen sal die priester celebrant hebben een wijquast mit wijwater in sijn handt mit diaken subdiaken ende dat choor afgaen beneden den altair ende lesen tsamen Miserere ende de profundis nae
hoere gewoonten biddende ende doen bidden een Pater Noster ende een Ave Maria voir den fundatoer absque specificatione nominis postquam mortem eiusdem cum expressa explicatione nominis fundatoris Noch sall den prior off procurator alle Jair opten pinxter dach synen conventualen uutrecken ende geven ses kannen goeden
Rijnsche wijn Ende noch alle Jair opten pynxter dach off binnen xiiij daghen dair nae onbegrepen den huysmeysters van Sunte Lijsbeths gasthuijse tot Culenborch een quatus schilling tot behoeff den huijsarmen des gasthuys voirscreven die de huysmeysters Inden tyt alle Jair ten daghe voirscreven
uut alle onse goeden rede ende onrede soe wair die gelegen syn off sullen syn uut rechten sullen muegen by gebreck van betalinge gelijck schult verwonnen mit allen rechten des sullen die huijsmeesters voirscreven schuldich syn toe sicht te hebben dat dese misse voiscreven tot allen tyden gedaen
wort gelijck voirscreven es Voirt in dien wij bij kerclictken nootsaecken dese singende misse ten dage ende ure voirgenoemt alsoe voirscreven is mitt costen off en mochten volbrengen sullen wij die verhalen des anderen dages voir off nae ende bij gebreck van dien des derden dages ende soe voert
Wel te verstaen dat dese misse in gheen weke achtergelaten en sall worden Ten waere wij bij oirloge ofte ander groote kercklicken nootzaecken sonder onse schulden off versumenisse uut onsen convent mosten vertrecken / een / twee / drie off vier maenden min off meer by alsoe sullen wy gehouden syn
alle die achtergelaten missen terstont als wij weder in onsen convent gecomen syn In bequamen tyden te verhalen in manijeren voirscreven / Mer in dien sulcx gesciede bij onsen schulden off versuym sal onse convent schuldich sijn soe die sulcx geboerden den huijsarmen te gheven ende betalen ses
gefalueerde Brabantsche stuver die die huysmeesters Inder tijt bij gebreke van beter altyt uut sullen panden aen allen onsen convents goeden soe wair ende in wat heeren lande die alsdan gelegen syn off sullen syn sonder enige pantweringe dair dat te doen off mit enige privilegien der oirden off statuten castumen off anders Int geestelick
off weerlijck recht te wederstaen des sullen die huysmeesters Inder tyt weder schuldich syn telcke reyse te doen lesen In onsen kercken In onser kercken van Sunte Barbaren een misse van Requiem voir die ziele deses fundatoers ende den overloop behouden tot behoeff ende profijt als voir Ende off gebuerden (dat Godt
verhueden will / dat onse clooster offte convent geheel tot met quame off dat wij die misse geheelicken doir onse versuym off schulden een Jair off meer lieten liggen alsoe dat dese misse alzoe voirscreven is met gesongen ende onderhouden en wordt soe sullen dese penningen / renthen off goeden voirscreven comen aen den huijsarmen
van Sunte Elizabethen huysser opten Havendijck voirscreven Behouden datmen aldair in die capelle alle weke opten dynsdach smorgens tusschen vij ende viij uren bij eenen eerlicken priester doen lesen sall een misse vanden Heijligen Geest mit miserere ende de profundis ende collecte nae den missen etcetera als d ander missen gewoontlick
is Welke misse die xij hysarmen sullen hoeren op hair knijen tbeste sy kunnen ende bidden voir die Ziele des fundatoers ende voer elcke misse sel men den priester gheven 1½ stuver ende niet min Dan off die oirde tconvent weder begreep ende den dienst onderhielt gelicx voirscreven is soe sullen sij van deser
voirscreven verval off pene wederom loss ende quyt sijn haer goet offte renthe hier toe staende selffs heffen ende bueren Allt sonder arch ende list soe hebben wij provinciael voirscreven des toirconde ter bede des proirs ende convents voirscreven onsen Zegel mit convents segel beneden aen desen brieff gehangen Anno duysent vyffhondert
vier ende veertich Ipso Vincentij Martijris Item soe kennen wy noch tot meerder verclaringe dat die (ijc.) soe geteykent staende doer onvoersiechticheijt is gescreven Ende behoort te sijn ende gescreven te wesen mit volcomelick expressij / te weten Twee hondert golden Rijnsche
Korvorster gulden etcetera Allet op condicien ende tijt voirscreven
Regest
1544 Vincentii Martiris
Broeder Jacob van Goch, prior van het covent Jherusalem te Culemborg, broeder
Lambert van Gelcom, supprior, broeder Peter van Boemell, procurator, en conventualen
verklaren ontvangen te hebben van Mr. Jan Hackert Anthonissoon, priester en vicaris van de
St. Barbarakerk, 200 Rijnse gulden waarvoor zij verschillende verplichtingen op zich
genomen hebben, o.a. een uitkering van ¼ schild per jaar aan het St.Elisabeth
gasthuis. Met dit geld worden de erfelijke renten van Goessen Berntz en Herberen van
Dichteren afgelost.
Met de zwaar geschonden zegels van de provinciaal in Alemannia bassa en van het
convent in bruine was.
Transfix, hieraan gehecht de brief d.d. 1545 april 22 ( zie regest 490. Zie ook
volgnr. 436.) Kleine scheur linksboven.
afmetingen in mm: 536 x 240
[^van de Ven nr. 469, Hokke nr. 435]
